BULA VAKAYALO (#6951)

Mo ni sa vakatubura mada e lomaqu e dua na yalo sa savasava Sara, O i Kemuni na noqu Kalou, ka Mo ni sa vakavoutaka na vakacegu ni noqu lewa e loma, Oi Kemuni na noqu i Nuinui! E na Nomuni kaukauwa vakayalo Mo ni sa vakadeitaki au mada e na Nomuni Cakacaka, O i Kemuni na noqu Ka Talei duadua, kei na rarama ni Nomuni lagilagi, Mo ni sa vakavotukanataka mai kina vei au na Nomuni gaunisala, O i Kemuni na i Naki vuni ni noqu gagadre! Mai na kaukauwa ni Nomuni igu cecere vaKalou Mo ni sa laveti au cake mada kina ki na lomalagi ni Nomuni veika vakayalo, O i Kemuni na Vu ni noqu bula, ka vakamarautaki au e na cagi mudre ka liwa e na Nomuni veigauna sa tawamudu, O i Kemuni ga O ni sa noqu Kalou! Ni laiva na rorogo kamikamica ka sega ni oti rawa e tu vei Kemuni me sa bau curumi au e na i rorogo ni veivakacegui, O i Kemuni na noqu i Tokani, ka Mo ni laiva na veivakatakilakila ni tukutuku talei ka Saluaki ni Nomuni i tutu sa sega ni vakacalai rawa me kauta mai vei au na marau, O i Kemuni ga O Koya sa vakaraitaki votu ka cecere duadua mai vei ira kece era sa vakaraitaki votu kei na ka vuni duadua mai vei ira na veika vuni kece ga!

-Bahá'u'lláh
-----------------------

BULA VAKAYALO (#6952)

Mai na wai drodro vakaisaluaki ni Nomuni bula tawamudu, Ni solia me u gunu mada kina, O i Kemuni na noqu Kalou, kei na vuanikau ni Nomuni Kau bula, vakarawarawataka me u tovolea mada, O i Kemuni na noqu i Nuinui! Mai na Tovure savasava ni Nomuni loloma, vakabobulatakiau me u gunu kina, O i Kemuni na noqu Ka Lagilagi, e na ruku ni yaloyalo ni Nomuni solisoli sega ni vakaiyalayala, laivi au me u vakararavi kina, O i Kemuni na noqu iSerau! E na lomanibai drokadroka ni tiko veivolekati kei Kemuni, e na Nomuni iSerau, vukei au me u rawa ni gade voli kina, O i Kemuni na noqu Daulomani, e na yasai matau ni Nomuni dabedabe ni veivosoti, vakatikori au, O i Kemuni na noqu Vu ni gagadre. Mai na i boi talei ni mudre ni cagi ni Nomuni marau, laiva e dua na icegu oqori me liwa baleti au, O i Kemuni na noqu i Naki vuni, ka me u curuma na i tutu cecekia e na parataisi ni Nomuni veika dina, O i Kemuni au taleitaka Duadua ga! E na memela ni rorogo ni domo ni ruve ni Nomuni Duavata, vakabulabulataki au me u vakarorogo kina, O i Kemuni sa Vakaturaga Duadua ga, ka vakusakusataki au e na yalo tabu ni Nomuni kaukauwa kei na Nomuni i gu, O i Kemuni na Noqu Dauveivakarautaki! Ni maroroi au me u tudei e na lomadonu ni Nomuni loloma, O i Kemuni na Dauveivukei e na gauna ni noqu leqa, e na gaunisala ni Nomuni gagadre uasivi, vakataudeitaka na noqu i lakolako, O i Kemuni O ni a buli au. E na loma ni were ni Nomuni veika bula tawamudu, kei na ruku ni Nomuni serau me u sa tiko ga kina ka tawamudu, O i Kemuni na Dauveivosoti e na vukuqu, e na dela ni i tikotiko ni Nomuni i tutu lagilagi, vakadeitaki au, O i Kemuni O ni sa lewai au! Ni laveti au cake ki na lomalagi ni Nomuni dauloloma kei na yalovinaka, O i Kemuni na Dauveivakatotolotaki, Mo ni tuberi au ki na iVola Siga ni Nomuni veiliutaki, O i Kemuni na noqu Dauveivakayarayarataki! Ni kacivi au me u tiko e na gauna e vakaraitaki kina na Nomuni yalotabu vuni, O i Kemuni na noqu i Tubutubu ka noqu Gagadre Cecere duadua, ki na itutu talei ni Nomuni serau, o koya O ni na vakaraitaka votu, vakalesui au tale kina, O i Kemuni na noqu Kalou! 

Sa tu vei Kemuni na kaukauwa kei na qaqa Mo ni vakayacora kina na ka e taleitaka na Lomamuni. E dina ga, sa i Kemuni, na dau Vakacerecerei Duadua, na Vu ni Lagilagi, na Vu ni Cecere.

-Bahá'u'lláh
-----------------------

BULA VAKAYALO (#6953)

O i Kemuni na Kalou! Ni vakabulabulataka mada ka vakamarautaka tale ga na yaloqu. Mo ni vakasavasavataka na utoqu. Mo ni vakalougatataka na noqu sasaga. Au sa vakotora na veika kece me baleti au e Ligamuni. O i Kemuni ga na noqu Dauniveivakasalataki ka noqu i Drodro. Au na sega tale ni dau yalorarawa se loma bibi, au na reki ka bula mamarau tiko ga. O i Kemuni na Kalou! Au sa na sega tale ni vakasinaita wale tu ga na yaloqu e na loma ocaoca, se vakalaiva na leqa me rawai au. Au na vakanadakuya na veika kece sa sega ni kilikili e na bula oqo.

O i Kemuni na Kalou! O ni sa noqu i tokani voleka cake sara ka yawa o i au ki vei au vakataki au. Au sa soli au vakatabakidua yani vei Kemuni, O i Kemuni na Turaga.

-`Abdu'l-Bahá
-----------------------

